IFK Gautaborg hefur undanfarna daga farið yfir málefni Kolbeins Sigþórssonar og ásakanir um ofbeldi frá árinu 2017. Málinu lauk með sátt árið 2018 en Kolbeinn hefur alla tíð neitað sök í málinu þrátt fyrir að hafa greitt miskabætur.

Í yfirlýsingu Gautaborg kemur fram að félagið hafi átt náið samtal við íslenska framherjann síðustu vikur. Kolbeinn fer í á morgun í aðgerð vegna meiðsla sem hafa hrjáð hann síðustu vikur. Málið var skoðað gaumgæfilega.

Um er að ræða meiðsli á ökkla en undanfarnar vikur hefur Kolbeinn spilað kvalinn en komist í gegnum leiki með því að láta sprauta sig í ökklann.

„Stjórnendur IFK Gautaborg hafa átt náið samtal við Kolbein síðustu vikur. Niðurstaða þess samtals er að við munum saman setja upp langtíma plan fyrir Kolbein. Planið byggir á gildum IFK Göteborg, ábyrgð okkar og skyldum sem vinnuveitanda. Það er líka byggt á markmiðum Kolbeins sem lúta að persónulegum árangri hans,“ segir í yfirlýsingu.

Málið er svo rakið er varðar umfjöllun á Íslandi. „ Varðandi lagalega stöðu málsins á Íslandi, þá var því lokið af hálfu allra hlutaðeigandi fyrir fjórum árum síðan.“

„Framundan er endurhæfing hjá Kolbeini sem mun krefjast mikils af honum. Við stöndum fyrir það sem nafnið okkar segir, félag samherja og við munum því styðja við og fylgja eftir endurhæfingunni hjá Kolbeini. Á næstu dögum mun Kolbeinn fara í aðgerð á fæti og loks byrja endurhæfingu samhliða vinnu í persónulegum árangri.“