Timo Werner, sóknarmaður Chelsea, er einn af þeim leikmönnum sem Borussia Dortmund sér sem hugsanlegan arftaka Erling Braut Haaland þegar sá norski yfirgefur félagið. Þetta kemur fram í frétt Bild.
Haaland, sem er 21 árs gamall, getur farið frá Dortmund fyrir 68 milljónir punda næsta sumar vegna klásúlu í samningi hans. Framherjinn hefur farið á kostum með Dortmund frá komu sinni frá Salzburg í janúar 2020. Hann mun því án efa vera á óskalista stærstu félaga Evrópu næsta sumar.
Fari Haaland, sem verður að teljast líklegt, þarf Dortmund að finna arftaka hans. Þar gæti hinn 25 ára gamli Werner verið lausnin.
Sá þýski hefur verið í vandræðum þegar kemur að markaskorun hjá Chelsea frá því hann kom til liðsins í fyrra.
Fyrir komuna til Englands lék hann hins vegar með RB Leipzig í Þýskalandi. Þar skoraði hann 95 mörk í 159 leikjum. Hann er því búinn að sanna sig sem markaskorari í Bundesligunni, eitthvað sem gæti heillað Dortmund.
