Framtíð Kylian Mbappe hjá Paris Saint-Germain er enn í óvissu. Leikmaðurinn er ekki sannfærður af stefnu félagsins. AS segir frá þessu.

Hinn 22 ára gamli Mbappe hefur verið frábær fyrir PSG frá því hann kom til félagsins árið 2017. Hann hefur þó reglulega verið orðaður við brottför frá Parísarliðinu, þá aðallega til Real Madrid.

Samningur Mbappe rennur út næsta sumar. Það er því stór áhætta fyrir PSG að fara inn í nýtt tímabil með Mbappe á sínum snærum, skrifi leikmaðurinn ekki undir. Að missa einn besta leikmann heims frítt myndi reynast dýrkeypt.

Þrátt fyrir að PSG hafi fengið til sín leikmenn á borð við Sergio Ramos, Gianluigi Donnarumma, Achraf Hakimi og Gini Wijnaldum í sumar er Mbappe ekki sagður sannfæðrur um stefnu félagsins.

Samningur með himinnháum launum er ekki það sem heillar hann. Hann vill vera viss um að geta barist um það að sigra Meistaradeild Evrópu með PSG.

Mbappe var ekki með Parísarliðinu í leik meistara meistaranna gegn Lille um síðustu helgi. Þá gat Mauricio Pochettino, stjóri PSG, ekki staðfest að Mbappe yrði með gegn Troyes í fyrstu umferð frönsku Ligue 1 á laugardag.