Spilamennska Grindavíkur var til umræðu í markaþætti Lengjudeildarinnar á mánudag. Liðið hefur gert fimm jafntefli í röð og hafa dýrmæt stig farið í súginn í toppbaráttunni.

,,Það er mjög dapurt,“ sagði Hrafnkell Freyr ágústsson, sérfræðingur þáttarins, um þá staðreynd að Grindavík hafi gert fimm jafntefli í röð.

Hrafnkell hélt áfram og gagnrýndi margt í spilamennsku liðsins.

,,Maður hefur séð fullt af leikjum hjá Gridavík í sumar. Það sem mér finnst vera vandamálið þeirra er að spilið þeirra er of hægt og boltinn rúllar ekki hratt manna á milli inni á miðjunni. Það er lítið tempó í þessu. Þeir þurfa að vera betri í að koma honum út á Dion og Odd Inga þegar hann kemur til baka, búa til einn á einn stöður fyrir þá og bara fylla teiginn.“

Grindvíkingar eru þó enn vel með í toppbaráttu Lengjudeildarinnar. Liðið er í fjórða sæti deildarinnar með 20 stig, 3 stigum frá ÍBV í öðru sætinu. Öll lið hafa leikið tólf leiki.

Hér fyrir neðan má sjá umfjöllunina um Grindavík sem og markaþátt Lengjudeildarinnar í heild sinni.