Íslenska karlalandsliðið sigraði það færeyska í vináttulandsleik ytra í kvöld. Frammistaða íslenska landsliðsins að stærstum hluta var fremur slök.

Heimamenn voru betri aðilinn í fyrri hálfleik og stjórnuðu leiknum. Íslendingar ógnuðu lítið fram á við en áttu þó besta færi hálfleiksins. Þá átti Jón Daði Böðvarsson bolta fram völlinn á Birki Bjarnason sem kom með góða fyrirgjöf á Kolbein Sigþórsson. Sá síðastnefndi var í afar góðu færi en skaut beint á Teit Gestsson í marki Færeyja. Staðan í hálfleik var markalaus.

Í upphafi seinni hálfleiks leit út fyrir að það sama yrði upp á teningnum. Íslendingar náðu þó að hressa aðeins upp á sóknarleikinn með innkomu þeirra Alberts Guðmundssona, Mikaels Neville Anderson og Stefán Teits Þórðarsonar. Ísland skoraði eina mark leiksins á 70. mínútu. Þá færði færði Birkir Bjarnason boltann upp völlinn, kom honum út til hægri á Albert sem skallaði boltann fyrir fætur Mikaels. Hann afgreiddi boltann svo glæsilega í fjærhornið. Þetta var hans fyrsta landsliðsmark.

Leikurinn róaðist aftur mikið eftir þetta. Færeyingar virtust ekki líklegir til að jafna og Íslendingar ekki til þess að bæta við. Á 85. mínútu átti Ögmundur Kristinsson þó virkilega mikilvæga vörslu þegar Petur Knudsen slapp í gegn og átti bara eftir að setja boltann í markið. Heimamenn komu boltanum svo í netið í uppbótartíma en þá var dæmt rangstaða.

Lokatölur 0-1 fyrir Ísland.