Það vakti athygli margra þegar Jónas Kristinsson framkvæmdarstjóri knattspyrnudeildar KR sagði upp störfum sínum í maílok. Það er sérstaklega tímasetning hennar sem vakti furðu margra, daginn fyrir aðalfund félagsins. Jónas hefur lengi verið í starfi hjá KR en þeir KR-ingar sem blaðamaður hefur talað við sögðu að uppsögn Jónasar hefði komið þeim í opna skjöldu.
Á aðalfundi KR var kosið um nýjan formann félagsins en Gylfi Aðalsteinsson hafði ákveðið að láta af störfum sem slíkur. Páll Kolbeinsson, sem tengist körfuboltadeild KR, og Lúðvík S. Georgsson voru í framboði. Samkvæmt heimildum var Jónas í hópi þeirra sem studdi Pál en Lúðvík hafði betur í slagnum um sætið á miklum átakafundi.
Eins og áður segir sagði Jónas starfi sínu lausi degi fyrir aðalfund félagsins þegar ljóst var að Lúðvík yrði kjörinn formaður. Frá uppsögn Jónasar hafa rætnar gróusögur um uppsögn hans flogið manna á milli, meðal annars um meint misferli sem Lúðvik hyggðist ljóstra upp um.
„Jónas sagði upp daginn fyrir aðalfund, ég held að þessar sögur séu mest gróusögur,“ sagði Lúðvík um málið.
Hann kvaðst vera meðvitaður um þær kjaftasögur sem væru í gangi en segir þær ekki á rökum reistar. „Ég get alveg fullvissað um það að það er ekkert til í þessu, það er búið að ganga frá starfslokasamningi við Jónas sem skrifað verður undir á næstunni. Hann mun verða okkar innan handar í starfinu á næstu mánuðum, svo að yfirfærslan gangi smurt fyrir sig,“ sagði Lúðvík.
Ekki náðist í Jónas við vinnslu fréttarinnar.