Stjórnarmenn PSG hafa haft samband við Sergio Ramos og vilja fá hann til félagsins. Ramos yfirgaf herbúðir Real Madrid á dögunum eftir 16 ár hjá félaginu. Þar vann hann 22 titla og er algjör goðsögn hjá spænsku risunum.
Miklar vangaveltur hafa verið um næsta áfangastað Ramos en nú er talið að PSG leiði kapphlaupið um varnarmanninn að því er segir í frétt Goal. Í fréttinni segir að nokkrir fundir hafi nú farið fram á milli félagsins og leikmannsins og líklegt sé að franska liðið bjóði honum samning á næstu dögum.
Ýmis lið hafa verið orðuð við kappann, þar má nefna Manchester United og nágranna þeirra í City, Chelsea, AC Milan, Roma, Inter Milan og Juventus.
Ljóst er að ýmsir möguleikar eru fyrir Ramos í sumar en hann hefur þó útilokað að ganga til liðs við Barcelona. Þá sagði hann einnig að endurkoma til Sevilla væri ekki á borðinu.