Julen Lopetegui þjálfari Sevilla er nýjasti maðurinn í röðinni til þess að hafna því að taka við sem knattspyrnustjóri Tottenham.
Tottenham rak Jose Mourinho úr starfi í apríl en félaginu hefur mistekist að finna eftirmann hans. Fjöldi þjálfara hafa afþakkað starfið og aðrir hafa ekki náð að klára viðræður við félagið.
Lopetegui sem áður stýrði Real Madrid og Spáni hafnaði því að taka við Tottenham um leið og félagið hafði samband. Hann er ánægður í herbúðum Sevilla, þetta staðfestir forseti félagsins.
Tottenham hefur rætt við Mauricio Pochettino, Antonio Conte, Paulo Fonseca og Gennaro Gattuso á síðustu dögum en án árangurs.
Brendan Rodgers hafði ekki áhuga á viðræðum og fleiri hafa verið í þeim sporum, Tottenham er í því erfiðri stöðu nú þegar styttist í að undirbúningstímabilið fari af stað.