Tveimur leikjum er nýlokið í Pepsi Max-deild kvenna.

Breiðablik burstaði Selfoss í stórleiknum

Selfoss tók á móti Breiðabliki fyrir sunnan og tapaði stórt.

Agla María Albertsdóttir kom Blikum yfir á 10. mínútu leiksins. Taylor Marie Ziemer tvöfaldaði forystu þeirra hálftíma síðar.

Undir lok leiks bættu gestirnir við tveimur mörkum. Karitas Tómasdóttir skoraði fyrst á 87. mínútu. Birta Georgsdóttir skoraði svo fjórða markið í uppbótartíma. Lokatölur 0-4.

Breiðablik er komið á topp deildarinnar með 15 stig. Selfoss er í þriðja sæti með 13 stig.

Fylkir vann Þrótt í Laugardalnum

Þróttur tók á móti Fylki í Laugardalnum. Gestirnir fóru heim með öll stigin.

Shaelan Brown kom heimakonum yfir á 5. mínútu. Bryndís Arna Níelsdóttir jafnaði fyrir Fylki á 13. mínútu.

Skömmu fyrir leikhlé kom Þórdís Elva Ágústsdóttir gestunum yfir.

Bryndís gerði sitt annað mark á 55. mínútu. Jelena Tinna Kujundzic, leikmaður Þróttar, varð svo fyrir því óláni að skora sjálfsmark um miðjan seinni hálfleikinn.

Ólöf Sigríður Kristinsdóttir klóraði í bakkann fyrir Þrótt með marki í blálokin. Lokatölur 2-4.

Fylkir er í áttunda sæti með 8 stig. Þróttur er í því fimmta með 9 stig.