Harry Maguire telur sig vera tilbúinn að byrja næsta leik Englendinga gegn Skotum á Wembley. Hann hefur ekki spilað leik síðan hann meiddist á ökkla gegn Aston Villa 9. maí síðastliðinn og hefur aðeins tekið þátt í sex æfingum með landsliðinu.

„Mér líður vel og ég þrái að byrja leikinn,“ sagði Maguire.

„Hvað varðar ökklann, þá líður mér eins og hann sé í lagi. Ég er í góðu standi og ferskur. Ég hef tekið þátt í nokkrum æfingum og er kominn í form. Ég er tilbúinn í leikinn.“

Maguire hefur komið þjálfara- og læknateymi Englendinga á óvart með forminu sínu eftir nokkrar vikur á hliðarlínunni. Það myndi þó koma á óvart ef Gareth Southgate myndi láta hann byrja leikinn gegn Skotum.

Tyrone Mings og John Stones mynduðu flott varnarpar á sunnudag í 1-0 sigri gegn Króatíu og telja enskir fjölmiðlar að þeir fái traustið aftur gegn Skotum á morgun.