Töf er á nýjum samningi stórstjörnunnar Lionel Messi við Barcelona vegna fjárhagsvandræða félagsins. Joan Laporta, forseti félagsins, segir að félagið þurfi að selja leikmenn áður en þeir geti tryggt framtíð Messi hjá félaginu.

Talið er að Messi verði áfram hjá Barcelona aðeins tólf mánuðum eftir að hann gaf félaginu formlegt bréf og bað um sölu. Flestir telja að Messi ætli að skrifa undir tveggja ára samning.

Laporta segir að klúbburinn verði að virða fjármálareglur UEFA og geti því ekki samið við Messi eins og er.

„Við verðum að fylgja reglunum. Það verða fleiri sölur og lán á leikmönnum okkar,“ sagði Laporta við vefsíðu félagsins.

Barcelona hefur nú þegar samið við Eric Garcia og Sergio Aguero á frjálsri sölu en missti af Gini Wijnaldum sem fór til PSG. Þá er einnig líklegt að félagið semji við Memphis Depay, fyrirliða Lyon, á frjálsri sölu. Talið er að Antoine Griezmann, Philippe Coutinho og Junior Firpo fari frá félaginu í sumar.

Það er algjört forgangsatriði hjá Barcelona að halda Lionel Messi og segir Laporta að það muni ganga eftir.

„Lionel Messi verður áfram á Camp Nou. Hann vill vera áfram og ég tek ekki neitun,“ sagði Laporta.

„Þetta er ekki auðvelt og við ætlum að gera allt sem við getum. Aguero hvetur hann á hverjum degi til þess að skrifa undir.“