Þjálfarinn Ólafur Kristjánsson var gestur í sjónvarpsþætti 433.is í gær en honum var nýlega sagt upp störfum hjá Esbjerg í Danmörku. Ólafur ræddi brottreksturinn í þættinum. Ólafur var spurður hvort tíðindin hefðu komið honum á óvart.

„Bæði og. Nýir eigendur urðu stórir hluthafar í klúbbnum, Ameríkanar, með asísku ívafi. Grúbba sem á félög í Evrópu. Það var búið að vera svolítið í pípunum að það væru að koma nýir fjárfestar inn þegar ég tek við. Einn af þeim punktum sem ég vildi ræða sem ég vildi vita var hvernig sýn stjórnarmanna á það að Esbjerg væri klúbbur sem væri búið að vera með marga þjálfara,“ segir Ólafur og vissi að það væri mikið um þjálfaraskipti hjá klúbbnum.

Þessir nýju fjárfestar voru að líta til lengri tíma og því kom brottreksturinn honum á óvart en þegar hann kíkir á hina klúbbana sem fjárfestarnir eiga þá er sama sagan þar. Þjálfari rekinn og þeirra maður kemur í staðinn.

„Þegar ég tek við spyr ég: „Hvernig sjá menn þetta,“, klúbbur í 1. deild sem sér sjálfan sig í efstu deild. Menn töluðu um að komast upp eins fljótt og hægt er en ekkert endilega á þessu tímabili. Svo eigum við mjög gott run fyrir áramót 2020 og liggjum helvíti vel. Þá verður til gír í mönnum og það var lag að koma upp. Svo koma þessir inn og þá var fínt að komast upp en ekki nauðsynlegt,“ segir Óli.

Þáttinn má sjá í heild sinni hér fyrir neðan.