Arnar Gunnlaugsson, þjálfari Víkings Reykjavík, kannast ekki við sögusagnir um það að Andri Rúnar Bjarnason hafi fengið samningstilboð frá félaginu. Þetta segir Mikael Nikulásson, sérfræðingur í hlaðvarpsþáttunum The Mike Show.

Andri Rúnar er samningsbundinn Esbjerg í Danmörku en átti erfitt uppdráttar á sínu fyrsta tímabili þar á bæ. Andri var talsvert meiddur og fann ekki markaskóna.

Í gær kom það fram í hlaðvarpsþættinum Dr. Football að Andri gæti verið á heimleið og að Víkingur hafi boðið honum ansi rausnarlegt tilboð. Mikael segist hafa rætt við Arnar og að hann hafi ekki kannast við sögusagnirnar.

,,Mér skilst nú, frá þjálfara Víkings sjálfum, að það sé ekki rétt en hvað er satt og hvað er ekki, við vitum það ekki. Við vitum hvernig þessi heimur virkar en Arnar var allavega ekki búinn að heyra af því,“ sagði Mikael í þætti gærdagsins.

Andri Rúnar jafnaði markametið í efstu deild karla á Íslandi árið 2017 þegar hann skoraði 19 mörk fyrir Grindavík. Esbjerg er talið tilbúið að láta hann fara. Hann gæti orðið mikill liðsstyrkur fyrir mörg lið hér heima.