Litlar líkur eru á því að stig verði dregin af Manchester United í ensku úrvalsdeildinni eftir að leik liðsins við Liverpool var frestað í gær vegna mótmæla í og við Old Trafford, heimavöll Manchester United.
Þetta herma heimildir TalkSport sem segja að það sé mjög ólíklegt að stig verði dregin af félaginu þar sem endanleg ákvarðanataka um frestun leiksins hafi verið tekin af forráðamönnum ensku úrvalsdeildarinnar.
Meiri líkur eru á því að félagið verði sektað ef þeir öryggisstaðlar sem eiga að vera í gildi í kringum leikvanga félaga í ensku úrvalsdeildinni á leikdegi, verða dæmdir ófullnægjandi.
Stuðningsmenn Manchester United, sem hafa verið að mótmæla eignarhaldi Glazer-fjölskyldunnar á félaginu, brutu sér leið inn á heimavöll liðsins, Old Trafford í gær með þeim afleiðingum að fresta þurfti leiknum.
Á ákveðnum tímapunkti var ekki ljóst hvort að leikurinn gæti farið fram í gær og síðan fékkst það staðfest að hann gæti ekki farið fram.
Hvorki leikmenn Manchester United né Liverpool náðu að mæta á Old Trafford sökum mótmælanna sem náðu bæði til heimavallar Manchester United og liðshótelsins þar sem liðið hélt til. Dómari leiksins, Michael Oliver, náði hins vegar að mæta á staðinn til þess að meta aðstæður.
Meðal þess sem þurfti að gera til að meta það hvort leikurinn gæti farið fram, var að sótthreinsa mögulega snertifleti á vellinum sökum Covid-19 faraldursins þar sem að fjöldi fólks safnaðist saman innan vallar.
Einnig þurfti að tryggja það að hægt væri að gæta fyllsta öryggis fyrir þá aðila sem áttu að koma að leiknum í, hvort sem það eru leikmenn, starfslið eða dómarar.
Uppspretta mótmælanna er óánægja stuðningsmanna Manchester United með eignarhald Glazer fjölskyldunnar á félaginu. Almenn óánægja með eigendur félagsins hefur verið við líði í nokkur ár, dropinn sem fyllti mælinn var ákvörðun eigendanna um að Manchester United gerðist stofnaðili að Ofurdeildinni, deild sem á endanum ekkert varð af.
Ekki er kominn nýr leiktími fyrir leik Manchester United og Liverpool en um þýðingamikinn leik er að ræða fyrir bæði lið. Það er ekki nóg að félögin séu svarnir fjendur, heldur er Liverpool í harðri baráttu um laust sæti í Meistaradeild Evrópu og Manchester United vill styrkja stöðu sína í 2. sæti deildarinnar.