„Þetta er dísilvél, mulningsvél,“ sagði Benedikt Bóas Hinriksson blaðamaður á Fréttablaðinu um lið Vals, Íslandsmeistararnir fara vel af stað í efstu deild karla og eru við topp deildarinnar með tíu stig eins og þrjú önnur lið.
Valur tekur á mót Leikni á heimavelli sínum í kvöld en liðið vann góðan 2-3 sigur á KR á útivelli á mánudag. Spilamennska Vals var ekki sannfærandi í leiknum en stigin komu í hús.
Guðmundur Andri Tryggvason sem Valur borgaði um tíu milljónir fyrir á dögunum kom ekki við sögu gegn KR. „Það segir manni að það séu gæði, skilja tugmilljóna manninn eftir. Hann fær ekki mínútu hann Guðmundur Andri.“
Heimir Guðjónsson þjálfari Vals er oft íhaldssamur og líður vel þegar hann þarf ekki að gera of miklar breytingar á byrjunarliði sínum. „Þú breytir ekki sigurliði, sú speki á ágætlega vel við,“ sagði Benedikt í sjónvarpsþætti okkar í vikunni.
Hannes Þór Halldórsson átti frábærar vörslur í marki Vals gegn KR, landsliðsmarkvörðurinn stóð fyrir sínu. „Ef menn ætla að vera í Íslandsmeistaraliði, þá þarftu markvörð sem vinnur 6-11 stig. Ég held að þarna hafi Hannes tryggt þrjú stig.“
Umræðuna má sjá hér að neðan.
