Florentino Perez, forseti Real Madrid, hefur neitað öllum sögusögnum um endurkomu Cristiano Ronaldo til klúbbsins. Framtíð Ronaldo hjá Juventus er í óvissu þessa dagana en samningur hans við ítölsku meistarana rennur út næsta sumar og segja fjölmiðlar á Ítalíu að stjórnarmenn Juventus vilji ólmir losna við hann vegna stóra launatékkans sem hann fær frá félaginu.
Þetta hefur leitt til þess að Ronaldo hefur verið orðaður við endurkomu á Santiago Bernabeu. Perez hefur sagt að það sé öruggt að svo verði ekki:
„Orðrómarnir um endurkomu Ronaldo til Madrid eru bara orðrómar sem teymi hans byrjaði með. Það er ekkert í gangi,“ sagði Perez í viðtali við El Larguero
Ronaldo fór eins og þekkt er til Juventus sumarið 2018 en tími hans þar hafa verið ákveðin vonbrigði. Hann hefur unnið tvo Seria A titla en hefur ekki unnið Meistaradeildina sem var markmiðið með kaupunum á honum.
Ronaldo er markahæsti leikmaður Real Madrid frá upphafi en hann skoraði 451 mark í aðeins 438 leikjum fyrir liðið. Madrídingar hafa átt í erfiðleikum eftir brottför kappans og þá sérstaklega í markaskorun.
Perez sem neitaði áhuga á Ronaldo sagði einnig að það væri hvorki möguleiki á að kaupa Mbappe né Erling Haaland í sumar án peninganna sem Ofurdeildin hefði gefið.
