UEFA tilkynnti í vikunni um breytingar á Meistaradeildinni. Sú tilkynning var lítið rædd enda fátt sem komst að í fótboltaheiminum annað en Ofurdeildin. UEFA tilkynnti að liðum verður fjölgað úr 32 í 36, og tvö af þessum auka sætum fara til klúbba sem hafa náð bestum árangri í Evrópu síðustu fimm ár en ekki náð Meistaradeildarsæti.
Þetta hefði þýtt það að lið sem hefði náð góðum árangri í Evrópu mörg ár í röð en átt eitt slakt tímabil heima fyrir ætti ennþá séns á að komast í Meistaradeildina. UEFA gæti neyðst til þess að breyta þessum plönum sínum um Meistaradeildina eftir að Ofurdeildin var kynnt til leiks segir í frétt Guardian.
Það sem vakti hvað mesta reiði við Ofurdeildina var sú staðreynd að þar þyrftu þessir 12 sögufrægu klúbbar ekki að vinna fyrir sætum sínum heldur ættu þeir alltaf fast sæti í deildinni á fornri frægð. Þetta stuðaði marga og eru stjórnarmenn UEFA hræddir um að sama umræða taki sig upp hjá þeim í Meistaradeildinni.
UEFA hefur ekki enn gefið neitt út um að þessum plönum verði breytt. Það gæti þó verið að í staðinn fyrir að „stóru liðin“ komist inn bakdyramegin í Meistaradeildina að þá fái deildarmeistarar í minni deildum beina inngöngu og þurfi ekki að fara í gegnum undankeppni.