Chelsea tók á móti Everton í ensku úrvalsdeildinni í kvöld. Leikurinn endaði með 2-0 sigri Chelsea en leikið var á Stamford Bridge í Lundúnum.
Gylfi Þór Sigurðsson var í byrjunarliði Everton og bar fyrirliðabandið í leiknum.
Chelsea komst yfir á 31. mínútu þegar að Ben Godfrey, leikmaður Everton varð fyrir því óláni að skora sjálfsmark.
Þannig stóðu leikar allt þar til á 65. mínútu þegar að Jorginho tvöfaldaði forystu Chelsea með marki úr vítaspyrnu.
Fleiri mörk voru ekki skoruð endaði leikurinn með 2-0 sigri Chelsea sem hefur enn ekki tapað leik undir stjórn Thomasar Tuchel.
Árangur Tuchel með Chelsea hingað til er frábær. Liðið hefur spilað 11 leiki, unnið átta og gert þrjú jafntefli. Skorað 13 mörk og aðeins fengið á sig tvö.
Þegar að Tuchel tók við liðinu af Frank Lampard sat það í 9. sæti en er nú í 4. sæti sem veitir þátttökurétt í Meistaradeild Evrópu.
Chelsea 2 – 0 Everton
1-0 Ben Godfrey (’31, sjálfsmark)
2-0 Jorginho (’65, víti)