Sportvikan hóf göngu sína á Hringbraut í gær þar sem Benedikt Bóas Hinriksson situr við stýrið. Guðmundur Benediktsson var gestur í fyrsta þætti ásamt Herði Snævar Jónssyni sérfræðingi þáttarins.
Ein af þeim fréttum sem rætt var um er frá því í október þegar karlalið Vals í knattspyrnu boðaði niðurskurð. Hagræði átti í rekstri eftir slakt gengi í efstu deild karla í sumar. Síðan þá hefur liðið heldur betur látið til sín taka á leikmannamarkaðnum.
„Þessi frétt kemur í byrjun október, þar sem Börkur Edvarsson boðar það að það þurfi að skera niður,“ sagði Hörður í þættinum..
„Þeir eru búnir að kaupa Orra Hrafn Kjartansson sem er sagður dýrasti leikmaður sem seldur hefur verið á milli liða á Íslandi,“ sagði Hörður.
Þá stökk Guðmundur Benediktsson til. „Hver segir það?,“ sagði Gummi.
Hörður svaraði þá til að Albert Brynjar Ingason leikmaður Fylkis hefði greint frá þessu.
„Mér finnst þetta alltaf svo skemmtilegt, þegar leikmenn eða stjórnarmenn frá félaginu sjálfu segja þetta. Ég get líka nefnt annan mann, Hjörvar Hafliðason. Hann heldur alltaf að þeir sem fara frá HK fari á metfé, Albert Brynjar heldur að þetta sé metfé frá Fylki. Ég er bara ekki að kaupa þetta,“ sagði Gummi Ben léttur.
Hörður tók þá aftur til máls. „Aron Jóhannsson er launahæsti leikmaður í sögu íslenska fótboltans, enginn hagræðing í því. Guy Smit hlýtur að kosta, Heiðar Ægisson. Það vissu allir í október að þetta væri leikþáttur hjá Berki,“ var sagt á léttum nótum.
Fagnaðarefni að peningar séu í boltanum:
Guðmundur sagði það auðvitað gott að miklir peningar væru í íslenskum fótbolta. „Eigum við ekki að fagna þessu? Við viljum hafa peningana í fótboltanum,“ sagði Gummi.
Hörður var á sama máli. „Ég elska þetta, elska að það séu komnir svona peningar. Önnur félög farin að bjóða peninga sem þau gerðu ekki áður til að keppa við Val,“ sagði Hörður.
Þáttinn má sjá í heild hérna.