Andri Rúnar Bjarnason er að ganga í raðir ÍBV en hann kemur til liðsins frá Esbjerg í Danmörku þar sem hann hefur verið í tvö ár.
Þetta kom fram í Dr. Football hlaðvarpinu í dag.
Andri Rúnar lék síðast á Íslandi sumarið 2017 þegar hann skoraði 19 mörk fyrir Grindavík og jafnaði markametið.
Framherjinn vildi koma heim en hann er að klára mál sín við Esbjerg og verður þá laus allra mála. Fram kom í Dr. Football í dag að Andri Rúnar væri búinn að skrifa undir í Eyjum.
FH stóð til boða að fá Andra Rúnar en hafði ekki áhuga á honum, Keflavík reyndi en Andri kaus frekar að fara til Eyja.