Newcastle United tók á móti Norwich City í ensku úrvalsdeildinni í kvöld. Leikið var á St. James Park.
Þetta var kjörið tækifæri fyrir Newcastle að vinna sinn fyrsta leik á tímabilinu en lærisveinar Eddie Howe gerðu sér erfitt fyrir strax í upphafi leiks þegar Ciaran Clark var rekinn af velli fyrir að toga niður Teemu Pukki, framherja Norwich.
Clark fékk að líta beint rautt spjald í kjölfarið og Newcastle menn orðnir manni færri eftir aðeins níu mínútna leik. Norwich tókst ekki að nýta sér liðsmuninn og staðan markalaus þegar flautað var til loka fyrri hálfleiks.
Heimamenn fengu dæmda vítaspyrnu eftir klukkutíma leik þegar boltinn fór í hönd Billy Gilmour eftir hornspyrnu Jonjo Shelvey. Callum Wilson fór á vítapunktinn og var heppinn að skora því að Tim Kruul, markvörður Norwich, varði spyrnuna í slána og inn.
Teemu Pukki jafnaði metin fyrir Norwich á 79. mínútu með glæsilegu marki en lengra komst liðið ekki og 1-1 jafntefli niðurstaða.
Newcastle er enn án sigurs í deildinni og situr á botninum með 7 stig. Norwich er í 18. sæti með 10 stig.
Newcastle 1 – 1 Norwich
1-0 Callum Wilson (‘61, víti)
1-1 Teemu Pukki (’79)