,,Ég held að taflan sýni okkur nóg. Einn sigur í síðustu sjö, það er bara ekki Manchester United sæmandi,“ sagði Eiður Smári Guðjohnsen um brottrekstur Ole Gunnar Solskjær frá Manchester United á dögunum.

Man Utd hafði aðeins unnið einn af síðustu sjö deildarleikjum sínum undir stjórn Solskjær. Ralf Rangnick er að taka við sem bráðabirgðastjóri hjá félaginu út tímabilið.

Eiður Smári var í setti Símans Sport fyrir leik Chelsea og Man Utd sem nú stendur yfir. Hann spyr sig af hverju Solskjær var ekki látinn fara í landsleikjaglugganum á dögunum.

,,Eins ljúfur og góður og hann er og maður vill honum ofsalega vel, eftir á að hyggja var maður farinn að spyrja sig: af hverju gerðist þetta ekki í landsleikjaglugga? Af hverju nýtti Manchester United sér ekki tímann í það: Okei, þetta þarf bara að gerast, þetta er óhjákvæmilegt, notum þann tíma,“ sagði Eiður.

,,En við erum kannski búnir að finna manninn til að taka við tímabundið, framtíðin kemur í ljós,“ sagði hann að lokum og vísaði í yfirvofandi ráðningu Rangnick.

Staðan í leik Chelsea og Man Utd er markalaus þegar rúmar 20 mínútur eru liðnar af leiknum. Michael Carrick er stjóri Man Utd í leiknum en búast má við að Rangnick taki við fyrir næsta leik.