Bogi Ágústsson, fréttamaður RÚV, var gestur í þættinum Chess After Dark í vikunni. Þar barst talið meðal annars að KR og Breiðabliki. Bogi er auðvitað mikill stuðningsmaður fyrrnefnda félagsins.

Annar þáttastjórnandi vildi meina að KR væri á rangri leið og kallaði liðið Knattspyrnufélagið Grund, eins og gjarnan er gert þegar skotið er á KR sökum meðalaldurs hópsins hjá karlaliðinu. Hann vísaði þá einnig í stórt tap KR gegn Blikum í Bose-bikarnum um síðustu helgi. Bogi gaf þó lítið fyrir þetta.

,,Upphafsleikurinn í Íslandsmótinu síðasta ár, sem KR spilaði. Hann fór fram hvar? Hann var í Kópavoginum er það ekki? Og hvernig fór hann? Knattspyrnufélagið Grund var mætt,“ sagði Bogi og vísaði í 0-2 sigur KR gegn Breiðabliki á Kópavogsvelli í Pepsi Max-deild karla síðasta sumar.

Hann hélt áfram. ,,Í einhverju móti um miðjan vetur, ef Blikar geta ekki montað sig af öðru þá er það bara flott, þá bara gera þeir það. En eftir þennan leik (síðasta sumar) hefðu menn getað sungið eins og menn syngja stundum á völlunum í Bretlandi ,,Can we play you every week?“

Bogi hélt áfram að ræða Breiðablik og sagði að félagið ætti að gera mun betur en raun ber vitni.

,,Breiðablik í sjálfu sér ætti að vera miklu stærra lið. Breiðablik hefur einu sinu sinni orðið Íslandsmeistari og KR 27 sinnum. Breiðablik er stærsta félagið í næststærsta bæjarfélagi landsins. Það búa í kringum 40 þúsund manns í Kópavogi. Þeir hafa á bakvið sig að minnsta kosti 25-30 þúsund manns, KR hefur það ekkert lengur.“

Fréttamaðurinn vinsæli benti einnig á að Valur hefði átt að standa sig mun betur í Pepsi Max-deild karla síðasta sumar vegna fjárhagslegs styrks félagsins.

,,Valur og Breiðablik hefðu átt að vera númer eitt og tvö í sumar en voru það ekki. Af hverju ekki? 

Hér fyrir neðan má sjá eða hlusta á þátt Chess After Dark í heild sinni. Um er að ræða léttan og skemmtilegan þátt þar sem gestir mæta, spila skák og spjalla.