Vanda Sigurgeirsdóttir, formaður KSÍ, vildi halda Eiði Smára Guðjohnsen í starfi aðstoðarlandsliðsþjálfara íslenska karlalandsliðsins í knattspyrnu. Þetta herma heimildir mbl.is
Stjórn KSÍ og Eiður Smári Guðjohnsen komust að samkomulagi um starfslok hans sem aðstoðarþjálfari A landsliðs karla í gærkvöldi. KSÍ nýtti sér uppsagnarákvæði í ráðningarsamningi Eiðs Smára og mun hann láta af störfum 1. desember næstkomandi.
Ákvörðunin var tekin á stjórnarfundi sambandsins í gær í höfuðstöðvum KSÍ í Laugardal.
,,Samkvæmt heimildum mbl.is var stjórnin klofin í afstöðu sinni til þess hvort nýta ætti uppsagnarákvæðið í samningi Eiðs Smára. Formaðurinn var einn af þeim sem vildu halda honum á meðan öðrum fannst tími kominn á breytingar. Þar sem Eiður Smári naut ekki fulls stuðnings innan stjórnarinnar komust báðir málsaðilar að endingu að þeirri niðurstöðu að best væri að leiðir myndu skilja,“ segir í frétt mbl.is um málið.
Á mánudag fóru að heyrast sögur af því að KSÍ ætlaði sér að segja upp samningi Eiðs Smára. Endalok hans hjá landsliðinu tengjast gleðskap þar sem leikmenn, þjálfarar og starfslið KSÍ hittist eftir leik í í Norður-Makedóníu fyrr í þessum mánuði. Þetta herma heimildir DV. Liðið lauk þar leik í undankeppni HM og bauð Knattspyrnusambandið í glas.
Flestir á svæðinu fengu sér 1-2 drykki að leik loknum en einhverjir sátu lengur. Samkvæmt heimildum DV átti Eiður Smári samtal við Vöndu á mánudag þar sem þau ræddu málið.