Sex leikjum er nýlokið í 5. umferð riðlakeppni Meistaradeildar Evrópu.
Man City 2-1 PSG
Manchester City tók á móti Paris Saint-Germain í stórleik kvöldsins. Heimamenn fóru með verðskuldaðan sigur af hólmi.
Leikurinn var nokkuð jafn til að byrja með en þegar leið á fyrri hálfleik tók Man City algjörlega yfir leikinn. Á löngum kafla skömmu fyrir leikhlé virtist markið liggja í loftinu. Það kom þó ekki. Markalaust var í hálfleik.
Snemma í seinni hálfleik, á 50. mínútu, kom Kylian Mbappe PSG svo yfir þvert gegn gangi leiksins.
Forysta PSG lifði þar til á 63. mínútu. Þá jafnaði Raheem Sterling fyrir Man City. Hann skoraði þá eftir góða sókn heimamanna.
Eftir jöfnunarmarkið var Man City alltaf lílklegt til að finna sigurmark og það kom á 76. mínútu. Þá skoraði Gabriel Jesus. Fyrirgjöfina átti Bernardo Silva eftir frábæra sókn Man City. Lokatölur urðu 2-1.
Club Brugge 0-5 RB Leipzig
RB Leipzig valtaði yfir Club Brugge. Liðið var 0-4 yfir í hálfleik eftir mörk frá Christopher Nkunku, Emil Forsberg (2) og Andre Silva. Nkunku bætti fimmta markinu svo við í lok leiks.
Úrslit kvöldsins þýða að bæði Man City og PSG eru komin í 16-liða úrslit fyrir lokaumferðina. Man City er á topp riðilsins með 12 stig og hefur unnið hann. PSG er með 8 stig í öðru sæti. Leipzig er svo með 4 stig í þriðja sæti og Club Brugge í því fjórða með jafnmörg stig.
Atletico Madrid 0-1 AC Milan
AC Milan vann dramatískan sigur á Atletico Madrid á útivelli. Junior Messias gerði sigurmark leiksins á 87. mínútu.
Liverpool 2-0 Porto
Á sama tíma vann Liverpool 2-0 sigur á Porto. Thiago Alcantara og Mohamed Salah gerðu mörk liðsins í seinni hálfleik.
Liverpool var þegar búið að vinna riðilinn fyrir þennan leik. Liðið er nú með 15 stig. Porto er í öðru sæti með 5 stig, Atletico í þriðja sæti með 4 stig og Milan í fjórða sæti, einnig með 4 stig. Þrjú lið berjast því um að fara í 16-liða úrslit með Liverpool.
Sporting 3-1 Dortmund
Dortmund er úr leik eftir 3-1 tap gegn Sporting.
Pedro Goncalves kom heimamönnum í 2-0 í fyrri hálfleik. Pedro Porro bætti svo við marki fyrir Sporting á 81. mínútu. Donyell Malen klóraði í bakkann fyrir Dortmund.
Ajax er á toppi riðilsins með 15 stig, Sporting í öðru sæti með 9 stig, Dortmund í því þriðja með 6 stig og Besiktas á botninum án stiga. Dortmund getur ekki farið upp fyrir Sporting vegna markatölu í innbyrðisviðureignum.
Sheriff 0-3 Real Madrid
Real Madrid vann öruggan 0-3 sigur á Sherriff. David Alaba og Toni Kroos komu Real í 0-2 í fyrri hálfleik. Karim Benzema bætti svo við marki snemma í seinni hálfleik.
Real er á toppi riðilsins með 12 stig og fer í 16-liða úrslit ásamt Inter sem er með 10 stig í öðru sæti. Sheriff er í þriðja sæti með 6 stig og fer í Evrópudeildina. Shaktar er á botni riðilsins með 1 stig.
