Arnar Grétarsson, þjálfari efstu deildar liðs KA, er gestur í þættinum 433.is sem sýndur verður á sjónvarpsstöðinni Hringbraut klukkan 20:00 í kvöld. Þar talar Arnar um starf sitt hjá KA en einnig reynslu sína af því að smitast af Covid-19 veirunni.

Arnar er laus úr einangrun en hann krækti í veiruna á erlendri grundu. „Við vorum erlendis í Tyrklandi í tíu daga og fórum aðeins til Grikklands. Á þriðja degi þar fann ég fyrir smá hita, það var á daginn áður en við fljúgum heim. Við tók langt ferðalag heim en ég fann ekki mikið fyrir veikindum en svo daginn eftir heimkomu greinist ég með Covid og allan tímann á meðan að ég var í einangrun fann ég nánast ekki neitt,“ sagði Arnar um pestina.

Arnar slapp vel frá veikindum en leiddist í einangrun á eigin heimili. ,,Ég sem betur fer fékk ekki að kynnast miklum einkennum af Covid-19 en ég fékk að kynnast einangrun og ég mæli ekki með henni,“ segir ARnar.

„Ég var lokaður inn í bílskúr hjá okkur í tíu daga og það er hægara sagt en gert. Ég er feginn að það sé búið og þá nýtur maður enn þá meira frelsisins. Maður getur rétt ímyndað sér hvernig þetta er fyrir þá sem eru lokaðir inn í litlum klefa allt sitt líf eða mörg ár, það getur ekki verið auðvelt,“ sagði Arnar Grétarsson, þjálfari KA í þættinum 433.is sem verður sýndur á sjónvarpsstöðinni Hringbraut í kvöld klukkan 20:00.