Stjarnan bauð Óskari Erni Haukssyni þrefalt hærir laun en KR, að auki fékk Óskar tveggja ára samning hjá Stjörnunni en KR var aðeins til í að bjóða Óskari eins árs samning. Óskar skrifaði undir hjá Stjörnunni í síðustu viku.

Rætt var um málið í sjónvarpsþætti 433 á Hringbraut í gær en samkvæmt heimildum þáttarins vildi KR lækka laun Óskars um meira en helming. Óskar er 37 ára gamall og er einn allra besti leikmaður í sögu KR.

„Óskar fær tilboð frá KR, formaðurinn fer í viðtal og maður heyrir að það er ekki að ganga upp. KR bauð honum árs samning en Stjarnan tveggja ára og þrefaldar hann í launum. Óskar er með barn og hann fær öruggan tveggja ára deal,“ sagði Benedikt Bóas Hinriksson blaðamaður á Fréttablaðinu í þættinum.

Þannig var Stjarnan tilbúið að gera Óskari tilboð sem hann gat ekki hafnað á meðan KR virtist hafa lítinn áhuga á að halda í hann.

„Auðvitað skrifar hann undir, Óskar Örn er ekki venjulegur 37 ára maður. Hann hefur hugsað gríðarlega vel um sig, hann er að fara út úr þægindarammanum fyrir allan seðilinn. Fara í nýtt um hverfi, hann á að kenna ungum mönnum hvernig á að vinna. Mér líst rosalega vel á þetta.“

Talað hefur verið um kaldar kveðjur frá KR til Óskars sem átti ótrúlegan feril um langt skeið í Vesturbænum.

„Ég er ekki viss um að KR hafi viljað halda honum miðað við það sem maður er að heyra og sjá. Þetta er leikjahæsti og markahæsti leikmaðurinn, hann hefur skemmt okkur í tuttugur ár.“