Ísland vann öruggan 5-0 sigur á slöku liði Kýpur í undankeppni HM í kvöld. Elísa Viðarsdóttir, spilaði sem vinstri bakvörður í leiknum og átti þrjár stoðsendingar. Þetta hafði hún að segja í viðtali við RÚV að leik loknum.

„Ég held að ég hafi bara skilað mínu verki í dag nokkuð vel, það skiptir ekkert öllu máli hvot maður er hægra eða vinstra megin. Vinstri fóturinn var dreginn fram í dag og það gekk ágætlega,“ sagði Elísa við RÚV eftir leik.

„Við hefðum alveg getað nýtt sumar stöður betur í dag á síðasta þriðjungi en við skoruðum fimm og héldum markinu okkar hreinu svo við þurfum að ganga sáttar frá borði.“

„Þetta var frábært verkefni, hópurinn þétti sig vel og þetta gefur góða raun út í næstu leiki.“

Elísa var mikilvægur hluti í uppspili liðsins í dag og átti þrjár stoðsendingar í leiknum.

„Ég er bara mjög sátt við mitt dagsverk en ég er líka með frábæra hausa þarna inni í teig sem eru gammar og pikka upp þessa bolta sem eru að detta.“

Að lokum var Elísa spurð að því hvort hún gæti hugsað sér að spila oftar sem vinstri bakvörður í framtíðinni?

„Ég veit það ekki, við verðum bara að sjá hvernig þjálfarinn velur liðið en ég er alltaf klár,“ sagði Elísa að lokum við RÚV.