Luis Suarez og Lionel Messi voru frábærir saman þegar þeir voru upp á sitt besta hjá Barcelona. Þeir eru einnig bestu vinir utan vallar og vilja eindregið spila saman aftur.
Suarez fór til Atletico Madrid á síðasta árið og átti sinn þátt í því að liðið varð meistari. Messi gekk til liðs við PSG í sumar vegna fjárhagsvandræða Barcelona sem gerði það að verkum að félagið gat ekki samið við hann.
Þeir félagarnir eru ennþá góðir vinir og fóru til dæmis saman í sumarfrí með fjölskyldum sínum í sumar. Þeir vilja ólmir fá að spila saman aftur og samkvæmt Diario Sport ætla þeir báðir til Bandaríkjanna sumarið 2023. Samningur Messi við PSG rennur út það sumar en samningur Suarez við Atletico rennur út sumarið 2022 en hann er í viðræðum um eins árs framlengingu.
Líklegasti áfangastaðurinn er Inter Miami, félagið sem er í eigu David Beckham, og telja fjölmiðlar á Spáni að viðræður hafi nú þegar átt sér stað.