,,Ég er bara sáttur, glaður með að hafa unnið. Þetta var hörkuleikur. Ef ég á að segja alveg eins og er þá var þetta ekki 4-0 leikur, verum bara sanngjörn,“ sagði Þorsteinn Halldórsson, þjálfari kvennalandsliðs Íslands við RÚV eftir 4-0 sigur á Tékklandi í undankeppni HM 2023 í kvöld.
Leikurinn var jafnari en úrslitin gefa til kynna en Ísland nýtti færin vel.
,,Við nýttum færin okkar öll í seinni hálfleik. Þessi þrjú mörk sem við skoruðum voru í raun öll færin sem við fengum,“ sagði Þorsteinn.
Hann hrósaði svo tékkneska liðinu.
,,Þær eru góðar í fótbolta, kunna alveg að spila, vilja halda boltanum. Þú þarft að vera svolítið einbeittur þegar þú spilar á móti þeim. Þær eru mikið í stuttu spili og þú ert mikið að elta. Þær eru mikið með boltann. Þær hefðu alveg getað skorað á okkur. Ef maður er bara sanngjarn með það, þetta var hörkuleikur en sem betur fer unnum við.“
Ísland mætir Kýpur í næsta leik á þriðjudag.
,,Við njótum þess í kvöld að hafa unnið. Klárum þennan leik á morgun, fara yfir hann. Í framhaldi af því byrjum við að undirbúa okkur fyrir Kýpur. Þar snýst þetta um hvernig við ætlum að gera hlutina. Það snýst um hvernig hugarfar við mætum með inn í þann leik. Ég þarf svolítið að fara öðruvísi í það að nálgast þær en það verður bara krefjandi og skemmtilegt verkefni,“ sagði Þorsteinn.
Ísland er nú með 3 stig eftir. Þorsteinn vakti athygli á því að liðið væri með málin í sínum höndum.
,,Staðreyndin er sú að við erum ennþá í bílstjórasætinu og getum treyst á sjálf okkur. Ef við vinnum rest förum við beint á HM.“