Sex leikjum er nýlokið í riðlakeppni Meistaradeildar Evrópu.
PSG 3-2 RB Leipzig
Kylian Mbappe kom Paris Saint-Germain yfir 9. mínútu gegn RB Leipzig. Andre Silva jafnaði metin fyrir gestina um 20 mínútum síðar. Staðan í hálfleik var jöfn.
Nordi Mukiele kom Leipzig yfir á 57. mínútu. Þá var hins vegar komið að Lionel Messi. Hann jafnaði leikinn á 67. mínútu og kom PSG yfir sjö mínútum síðar með marki úr vítaspyrnu.
Mbappe klúðraði vítaspyrnu í blálokin. Lokatölur urðu 3-2.
Atletico Madrid 2-3 Liverpool
Mohamed Salah kom gestunum frá Liverpool yfir strax á 8. mínútu gegn Atletico Madrid. Naby Keita tvöfaldaði forystuna stuttu síðar.
Atletico jafnaði leikinn þó í fyrri hálfleik með tveimur mörkum frá Antoine Griezmann.
Hann fékk svo rautt spjald snemma í seinni hálfleik fyrir að sparka óvart í andlit Roberto Firmino.
Liverpool skoraði þó sigurmark á 78. mínútu. Þar var að verki einn allra heitasti knattspyrnumaður heims um þessar mundir, Salah.
Porto 1-0 Milan
Porto vann 1-0 sigur á AC Milan. Eina mark leiksins skoraði Luis Diaz á 65. mínútu.
Ajax 4-0 Dortmund
Ajax valtaði yfir Dortmund í Amsterdam. Liðið komst yfir eftir rúmar tíu mínútur með sjálfsmarki Marco Reus. Daley Blind tvöfaldaði forystu Ajax um miðjan fyrri hálfleik.
Tvö mörk bættust við í seinni hálfleik, Ajax skoraði bæði. Þau gerðu Antony og Sebastian Haller.
Inter 3-1 Sheriff
Sheriff tapaði sínum fyrstu stigum í riðlinum er liðið heimsótti Inter.
Edin Dzeko kom Inter yfir á 34. mínútu. Var það eina mark fyrri hálfleiks.
Sebastien Thill jafnaði metin á 52. mínútu. Inter svaraði þó með tveimur mörkum frá Arturo Vidal og Stefan de Vrij.
Shaktar 0-5 Real Madrid
Real Madrid burstaði Shaktar á útivelli, 0-5.
Madrídarliðið var nokkurn tíma að finna fyrsta markið en það kom þegar Sergey Krivtsov setti boltann í eigið net.
Í seinni hálfleik skoraði Vinicius Jr. svo tvö mörk fyrir Real með stuttu millibili áður en Rodrygo og Karim Benzema bættu við tveimur mörkum í viðbót.
