Sparkspekingurinn Gary Lineker borgaði 3 þúsund pund svo að Sophie Scargill, leikmaður Doncaster Rovers í fjórðu efstu deild kvenna á Englandi, gæti farið í aðgerð.
Scargill meiddist í september. Félag hennar gat ekki hjálpað henni. Henni var sagt að hún gæti þurft að vera á biðlista í tvö ár eftir aðgerð. Það hefðu mögulega getað bundið enda á feril hennar.
Scargill hóf söfnun til þess að freista þess að safna þeim 5 þúsund pundum sem hún þurfti til.
Leikmaðurinn var komin með rétt rúmlega 2 þúsund pund, þar sem leikmenn karlaliðs Doncaster höfðu meðal annars lagt inn á styrktarreikninginn.
Þá tók Lineker sig til og borgaði restina. ,,Ég sé að þig vantar 3 þúsund í viðbót. Ég vil glaður hjálpa. Vonandi spilarðu fótbolta aftur sem fyrst,“ skrifaði hann.
,,Vá. Ég er orðlaus. Trúi þessu ekki,“ skrifaði Scargill á Twitter. ,,Ég vil þakka þeim sem hjálpuðu mér af öllu hjarta. Gary Lineker, þitt ótrúlega framlag gerir það að verkum að ég get hafið endurhæfingu strax.“
