Það eru ekki bara Víkingur Reykjavík og ÍA sem hafa að einhverju að keppa þegar liðin mætast í bikarúrslitum karla á morgun. KR á einnig mikið undir en með sigri Víkings Reykjavíkur á laugardaginn myndi KR fá sæti í Evrópukeppni á næsta tímabili.
Arnar segist ekki hafa komist hjá því að fá velfarnarðaróskir frá KR-ingum fyrir leikinn á morgun.
,,Maður hittir einn og annan. Ég á mjög marga og góða vini í KR og leið mjög vel í þeim klúbbi á sínum tíma. Það væri sönn ánægja að vinna titilinn og hjálpa KR líka, það væri alveg geggjað. Auðvitað hittir maður KR-inga nánast á hverjum einasta degi og það fer ekkert á milli mála hvernig þeim finnst að leikurinn ætti að fara,“ sagði Arnar Bergmann Gunnlaugsson, þjálfari Víkings Reykjavíkur.
Evrópuleikjum fylgir ekki bara skemmtileg reynsla fyrir félögin heldur er þar einnig að finna margar milljónir sem koma frá Evrópska knattspyrnusambandinu (UEFA). Víkingur Reykjavík hefur þegar tryggt sér Evópusæti sem Íslandsmeistarar en það skýrist á morgun hvort það verði ÍA eða KR sem hreppir síðasta Evrópusætið.
Bikarúrslitaleikur Víkings R. og ÍA fer fram á Laugardalsvelli á morgun klukkan 15:00.
