Tveimur leikjum var að ljúka í riðlakeppni Meistaradeildar kvenna rétt í þessu. PSG og úkraínska liðið Zhytlobud-1 áttust við í B-riðli á meðan að Wolfsburg tók á móti Servette Chenois frá Sviss í A-riðli.
PSG var með 3-0 forystu gegn Zhytlobud í hálfleik eftir þrennu frá hinni kanadísku Jordyn Huitema. Paulina Dudek bætti við fjórða markinu eftir tæpan klukkutíma leik með skalla úr hornspyrnu og Lea Khelifi skoraði fimmta mark heimakvenna á 88. mínútu og lokatölur 5-0 fyrir PSG sem er með 6 stig eftir tvo leiki í B-riðli en Parísarliðið vann Breiðablik í fyrsta leiknum. Zhytlobud-1 er án stiga eftir tvær umferðir.
Wolfsburg burstaði þá Servette Chenois 5-0. Svenja Huth kom Wolfsborg yfir eftir 18 mínútna leik og Tabea Wassmuth bætti við tveimur mörkum fyrir loka fyrri hálfleiks. Dominique Bloodworth og Joelle Smits bættu við tveimur mörkum í seinni hálfleik. Wolfsburg er efst í A-riðli með 4 stig eftir tvær umferðir. Servette Chenois er án stiga.
Breiðablik og Real Madrid mætast á Spáni klukkan 19:00 í kvöld þar sem Blikar sækjast eftir sínum fyrstu stigum í riðlakeppninni.