„Ég var mjög ánægður með hvernig við byrjuðum leikinn. Við gerðum það sem við lögðum upp með, hreyfa bolta hratt á milli kanta. Þeir eru góðir í að loka miðsvæðinu vel. Fyrsta markið var það sem við töluðum um og vorum að gera á æfingu í gær. Ánægður með að skora fjögur mörk og ánægður með að halda hreinu. Mér fannst við sloppy í byrjun hálfleiks, við höfðum talað um það í hálfleik að vera það ekki. Síðasta korterið þar sem við erum manni fleiri þá sköpum við slatta. Heilt yfir er ég sáttur, það er erfitt að stjórna svona leiknum,“ sagði Arnar Þór Viðarsson þjálfari Íslands á fréttamannafundi í Laugardalnum í kvöld.
Ísland vann 4-0 sigur á Liechtenstein en tæplega 5 þúsund áhorfendur á vellinum. „Það var gaman á vellinum í kvöld, góður stuðningur. Í fyrsta skipti fyrir mig að hafa alvöru íslenska stemmingu sem þjálfari.“
Andri Lucas Guðjohnsen skoraði fjórða markið í leiknum eftir stoðsendingu frá Sveini Aroni Guðjohnsen bróðir hans. „Það er frábært, það er smá rómantík í þessu. Ég var líka ánægður með hvernig Sveinn Aron kom inn. Að annar þeirra leggi upp fyrir hinn. Það er rómantík í því.“
Íslenska liðið er með átta stig í riðlinum og er fimm stigum frá öðru sætinu. Með ögn stöðugri frammistöðu væri liðið í dauðafæri á sæti í umspili um miða á HM.
„Við komum inn í þennan glugga með það fyrir augum ef við hefðum tekið sex stig þá væri einhver séns. Það var ómögulegt að spá það fyrir sér í mars hvað myndi ganga á fyrir okkur. Þetta er mjög rétt metið, eitt jafntefli á réttu augnablik hefði breytt stöðunni. Það er staðan eins og hún er núna, við vitum öll hvað hefur gengið á. Vinnan núna er að halda áfram að vinna með þetta lið og sjá að við séum í betri stöðu á næstu árum,“ sagði Arnar.
„Við höfum talað um það frá því í september, staðan var önnur í mars. Við erum á þeim punkti að ég er að komast nær því að finna út úr því hvernig hópurinn verður næstu árum. Finna tvöföldun í hverja stöðu, mér finnst við hafa tekið ákveðin skref. Ég er mjög sáttur með hvernig liðið hefur spilað, á móti Armeníu og í dag. Það var fúlt að vinna ekki Armeníu. Við erum að taka réttu skrefin í rétta átt, nóvember verkefnið verður mjög mikilvægt. Góðir leikir til að komast á niðurstöðu um hópinn fyrir næstu verkefni,“ sagði Arnar.
Birkir Bjarnason var að leika sinn 103 landsleik og er hann einum leik frá því að jafna met Rúnars Kristinssonar yfir fjölda leikja. „Birkir er búinn að vera frábær, hvort sem það var í mars eða júní þegar hann var einn af þeim reynsluboltunum sem gaf kost á sér. Hann sagðist koma í alla leikina, þetta er það sem maður vill fá. Hann er búinn að spila yfir 100 landsleik hann veit hvernig á að vinna leikina og nálgast þá. Það er það mikilvægt að hafa þessa leikmenn í hópnum, það er ekki bara Birkir. Hann hefur verið frábær fyrsta degi fyrir mig,“ sagði Arnar.
