Arnar Þór Viðarsson, þjálfari A-landsliðs karla, og Birkir Bjarnason, landsliðsmaður, segja andleysi alls ekki ríkja innan liðsins. Þeir voru spurðir út í þetta á blaðamannafundi í kjölfar þess að liðið var gagnrýnt fyrir að syngja ekki með í þjóðsöngnum.

,,Þegar íslensk landslið ná lengst þá einkennast þau ef mikilli ákefð og stemningu. Nýja íslenska landsliðið er skipað efnilegum og flottum fótboltamönnum en skortir þessa liðsstemningu. Fyrsta skref: syngja með þjóðsöngnum. Áfram veginn,“ skrifaði Viðar Halldórsson, háskólaprófessor á Twitter.

Kári Kristján Kristjánsson, landsliðsmaður í handbolta, tók þá til máls á Facebook.

,,Kann engin helvítis Þjóðsönginn? Og eitt gerpið að japla tyggjó á meðan. Fyrirliðinn eins og stytta! Átakanlegt!“

,,Mér finnst svolítið sérstakt að hann komi með þetta núna. Ég hef verið í landsliðinu í 11-12 ár. Sumir syngja og aðrir ekki,“ sagði Birkir um umræðuna.

,,Mér fannst hann fara yfir strikið hvernig hann orðaði þetta en allir mega hafa sína skoðun.“

Arnar Þór Viðarsson ræddi þetta einnig á blaðamannafundinum.

,,Ef það er verið að tala um andleysi þá er ég alls ekki sammála því. Ég held að liðsandinn sé mjög góður í hópnum.“

,,Það er mjög sérstakt að fólk utan hóps tali um það sem er að gerast innan hóps.“