Chelsea ákvað í gær að reka Frank Lampard úr starfi knattspyrnustjóra og er búist við því að Thomas Tuchel verði ráðinn til starfa í dag.

Gengi Chelsea síðustu vikur hefur verið slakt og hefur Roman Abramovich, eigandi Chelsea tekið ákvörðun um að reka Lampard úr starfi. Chelsea situr í níunda sæti ensku úrvalsdeildarinnar, ellefu stigum á eftir toppliði Manchester United.

Roman Abramovich lét Lampard fá 200 milljónir punda í leikmannakaup í sumar en árangurinn fylgir ekki með, eigandi Chelsea er ekki þekktur fyrir mikla þolinmæði gagnvart stjórum sínum.

Kai Havertz og Timo Werner voru keyptir til félagsins og voru dýrustu leikmennirnir sem félagið fékk, báðir komu frá Þýskalandi. Þeir hafa ekki spilað vel og hafa í raun verið hálfgerðir skúrkar í liði Chelsea á tímabilinu.

Þessir tveir dýru leikmenn og frammistaða þeirra voru á endanum það sem kostaði Lampard starfið, þeir félagar þéna samtals um 102 milljónir íslenskra króna á viku. Havert og Werner eru launahæstu leikmenn Chelsea en hafa litlu sem engu skilað.

Havertz er launahæstur með 310 þúsund pund á viku samkvæmt enskum blöðum, Werner er með ögn minna. Ben Chilwell sem félagið fékk í sumar er svo með um 190 þúsund pund á viku.

Hér að neðan má sjá launahæstu leikmenn Chelsea.