Burnley vann í gær magnaðan 1-0 sigur á útivelli gegn Englandsmeisturum Liverpool. Það sem gerir sigurinn enn sérstakari er sú staðreynd að þetta var fyrsta tap Liverpool á Anfield í ensku úrvalsdeildinni í 1.369 daga.

Síðasta tap Liverpool á heimavelli í ensku úrvalsdeildinni fyrir leikinn í kvöld kom á móti Crystal Palace í apríl árið 2017.

Síðan þá hafði Liverpool leikið 69 leiki á heimavelli í deildinni. Unnið 55 leiki og gert 13 jafntefli, hreint út sagt ótrúleg taplaus hrina leikja sem er nú komin á enda.

Thiago Alcantara gekk í raðir Liverpool síðasta haust og hefur ekki upplifað góða tíma. Liðið hefur aðeins unnið einn deildarleik með Thiago á þessu tímabili, það kom í hans fyrsta leik gegn Chelsea.

Thiago meiddist síðan en hefur byrjað síðustu leiki þar sem Liverpool hefur hvorki tekist að vinna leik eða skora mark. Didi Hamann. fyrrum miðjumaður Liverpool telur að Thiago Alcantara geri Liverpool að lélegra liði en það var fyrir. Spænski miðjumaðurinn gekk í raðir Liverpool síðasta haust frá FC Bayern.

„Liverpool hefur um talsvert skeið verið mikið með boltann en þeir fundu alltaf leið til að brjóta upp varnir,“ sagði Hamann.

„Takturinn í liðinu mun breytast með Thiago þarna og ekki til betri vegar að mínu viti. Hann er bestur þegar lið heldur boltanum lengi, það er ekki það sem Liverpool hefur gert síðustu ár.“

Tölfræði um gengi Liverpool með og án Thiago er hér að neðan.