Fulham tók á móti Manchester United í ensku úrvalsdeildinni í fyrrdag. Leikurinn endaði með 2-1 sigri Manchester United en leikið var á Craven Cottage, heimavelli Fulham. Fulham komst yfir strax á 5. mínútu leiksins með marki frá Ademola Lookman sem skoraði eftir stoðsendingu frá André Zambo Anguissa.
Edinson Cavani, jafnaði leikinn fyrir Manchester United á 21. mínútu og stóðu leikar 1-1 í hálfleik. Paul Pogba kom Manchester United yfir með marki á 65. mínútu sem reyndist sigurmark leiksins. Markið sem Pogba skoraði var hans á fjórða á tímabilinu, þrjú af mörkunum hafa komið í deildinni en eitt kom í deildarbikarnum gegn Brighton.
Pogba hefur sjaldan spilað betur fyrir Manchester United en síðustu vikur, eftir að umboðsmaður hans steig fram í desember og sagðir Pogba vilja burt, hefur allt gengið upp.
Franski miðjumaðurinn hefur unnið sér inn fast sæti í byrjunarliði United og hefur nú skorað sigurmarkið í tveimur af síðustu þremur leikjum.
Ensk blöð fjalla um málið og segja að Darren Fletcher, sem kom aftur til félagsins fyrir þremur mánuðum eigi stóran þátt í góðu gengi Pogba. Fletcher snéri aftur til United fyrir þremur mánuðum en á dögunum var hann settur í þjálfarateymi Ole Gunnar Solskjær.
Fletcher átti góð ár sem leikmaður hjá Manchester United, hann var leikmaður sem Sir Alex Ferguson treysti fyrir öllu.
Fletcher hefur unnið náið með Pogba síðustu vikur og er sagður njóta þess að leiðbeina miðjumönnum félagsins.