Mohamed Salah, framherji Englandsmeistara Liverpool, hefur blásið á orðróma um að hann vilji fara frá félaginu. Núverandi samningur Salah við Liverpool rennur út sumarið 2023.

Í viðtali við norsku sjónvarpsstöðina TV2, var Salah spurður um framtíð sína hjá Liverpool.

„Ég vil vera hér eins lengi og ég get, en eins og ég hef sagt áður, þá er þetta í höndum félagsins. Ég mun alltaf gefa 100% alveg til síðustu mínútu. Ég er í þessu félagi og vil vinna eins marga titla og ég get,“ “ sagði Salah.

Salah hefur verið orðaður við brottför og sögusagnir hafa verið á kreiki um að Barcelona og Real Madrid vilji fá hann til liðs við sig.

Salah hefur spilað 178 leiki fyrir Liverpool, skorað 111 mörk og gefið 45 stoðsendingar. Þá hefur hann orðið Englands- og Evrópumeistari með liðinu.