Arsene Wenger telur að norski framherjinn Erling Braut Haaland muni enda í ensku úrvalsdeildinni.

Hinn 21 árs gamli Haaland hefur verið frábær fyrir Dortmund frá því hann kom til félagsins frá Salzburg í janúar 2020.

Klásúla í samningi hans gerir það að verkum að hann getur farið til hvaða félags sem tilbúið er að greiða 75 milljónir evra fyrir hann næsta sumar. Það er því ljóst að stærstu félög heims munu slást um þjónustu Haaland.

Af enskum félögum var norðmaðurinn ungi var orðaður við Manchester-liðin og Chelsea í sumar. Síðastnefnda félagið krækti hins vegar í Romelu Lukaku á tæpar 100 milljónir punda.

Þá hafa Barcelona og Real Madrid á Spáni einnig verið nefnd til sögunnar. Wenger, sem er goðsögn hjá Arsenal eftir að hafa stýrt liðinu í 22 ár, telur þó að Haaland muni velja ensku úrvalsdeildina fram yfir þá spænsku.

,,Ég held að það muni gerast (að Haaland komi í ensku úrvalsdeildina). Fjárhagslegt afl hennar er of sterkt,“ sagði Frakkinn við Bild. 

,,Enskur fótbolti er á toppnum því þar eru mestu peningarnir. Bestu leikmennirnir gera það sem þeir þurfa til að ná sér í bestu launin,“ bætti hann við.