Kristján Óli Sigurðsson, sérfræðingur í hlaðvarpsþáttunum Dr. Football, vill sjá nýjan formann Knattspyrnusambands Íslands ráða Heimi Hallgrímsson til starfa sem landsliðsþjálfara karla á nýjan leik. Þetta sagði hann í nýjasta þætti hlaðvarpsins.

Guðni Bergsson, sem og stjórn KSÍ, sögðu af sér á dögunum. Mikið fjaðrafok hefur verið í kringum sambandið vegna ásakanna um að það taki ekki á ábendingum um meint brot landsliðsmanna og að hylmt væri yfir slíkum málum.

Stjórn KSÍ hefur boðað til aukaþings í byrjun október þar sem ný stjórn til bráðabirgða tekur við. Sú stjórn mun sitja fram í febrúar þegar ársþing sambandsins fer fram, þá verður kosið um nýjan formann og nýja stjórn.

Arnar Þór Viðarsson er landsliðsþjálfari í dag. Undir hans stjórn hefur Ísland aðeins unnið einn leik af fjórum í undankeppni Heimsmeistaramótsins í Katar sem fram fer á næsta ári.

Heimir var aðalþjálfari íslenska liðins sem komst á HM 2018. Hann hætti með liðið eftir það mót. Kristján Óli vill sjá nýjan formann KSÍ ráða Heimi til starfa svo möguleiki sé á að íslenska landsliðið verði með á Evrópumótinu 2024, möguleikinn á að komast á HM í Katar sé úr sögunni.

,,Við erum búin að spila fjóra leiki í þessari undankeppni, við erum búin að vinna Lichtenstein. Við höfum ekki átt breik í neinum öðrum leik. Þess vegna spyr ég bara, hvað er númerið hjá Heimi Hallgrímssyni?“

,,HM er dautt. EM 2024 er okkar von og ef við ætlum að fara þangað þá þurfum við að fá Heimi Hallgrímsson ASAP. Guðni Bergsson er farinn úr KSÍ, þar voru ‘conflictar’, þeir gátu ekki unnið saman lengur. Það er búið að hreinsa það, sú gata er greið. Næsti formaður, hans fyrsta verk verður að ‘signa’ Heimi Hallgrímsson beint í landsliðið.“

Ísland tekur á móti Norður-Makedóníu í undankeppni HM í dag. Leikurinn hefst klukkan 16 og verður að sjálfsögðu fjallað vel um hann hér á 433.is