Ekki var ýkja fjölmennt á mótmælum sem boðað höfðu verið á Laugardalsvelli klukkan 17:00 í dag, þegar mótmælin hófust voru tæplega 20 einstaklingar mættir til að mótmæla.

Mikil gagnrýni hefur á KSÍ vegna ásakana um að sambandið hylmi yfir meint ofbeldis og kynferðisbrot landsliðsmanna. Boðað var til mótmælanna af Bleika fílnum og aðgerðarhópnum Öfga.

Fyrst um sinn voru mótmælin boðuð til þess að mótmæla Guðna Bergssyni, stjórn KSÍ og Klöru Bjartmarz framkvæmdarstjóra og átti að biðja þau um að yfirgefa starf sitt.

Eins og alþjóð veit hafa Guðni og stjórn KSÍ þegar sagt af sér vegna málsins og Klara Bjartmarz hefur verið send í leyfi sem hefur eflaust sefað reiði margra.

„Það virðist sem sumir af þessum mönnum líti svo á að þeir séu ósnertanlegir – við erum hér meðal annars til að minna þá á að svo sé ekki,“ segir Tanja M. Ísfjörð, meðlimur Öfga meðal annars við Fréttablaðið í dag.

Nokkuð var um öryggisgæslu áður en mótmælin hófust en allt fór hins vegar friðsamlega fram.