Borussia Dortmund hefur sett verðmiða á Erling Haaland sem fælir öll félög sem sýnt hafa áhuga frá. Frá þessu segja ensk blöð í dag.

Dortmund vill 200 milljónir evra fyrir Haaland í sumar, kemur það mörgum á óvart hversu hár verðmiðinn er. Klásúla í samningi Haaland gerir honum kleift að fara frá Dortmund fyrir um 80 milljónir punda á næsta ári.

Haaland hefur átt frábæra 18 mánuði hjá Dortmund en Mino Raiola umboðsmaður hans hefur meðal annars fundað með Barcelona og Real Madrid síðustu vikur.

Manchester City, United og Chelsea hafa einnig sýnt honum áhuag en 200 milljóna evra verðmiðinn verður til þess að ekkert lið munn stökkva til í sumar.

Dortmund er tilbúið að selja Jadon Sancho í sumar en félagið ætlar sér að halda í Haaland í ár til viðbótar.