Phil Foden var gjörsamlega brjálaður þegar hann kíkti á síma sinn eftir góðan sigur á Borussia Dortmund í gær. Foden skoraði sigurmark City í 1-2 sigri á Borussia Dortmund, City er komið í undanúrslit.

Liðið mætir þar PSG en stuttu eftir leik kom Twitter færsla frá Foden. „Kylian Mbappe ertu klár?,“ stóð í færslunni en Mbappe er hættulegasti leikmaður PSG.

Foden setti færsluna ekki sjálfur inn heldur fyrirtæki sem hann notar sem stýrir samfélagsmiðlum sínum, hann var verulega ósáttur með þessa færslu.

Hann taldi færsluna ekki við hæfi og að þetta væri aðeins gert til þess að espa upp PSG og Mbappe.

Gary Neville hefur gagnrýnt leikmenn sem flestir nota svona fyrirtæki fyrir samfélagsmiðla sína, þetta sé ópersónulegt. Hann gerði það aftur í morgun eftir færsluna frá Foden sem var eytt.

„Ég nefndi þetta fyrir nokkrum vikum um að leikmenn væru að láta fyrirtæki stjórna samfélagsmiðlum sínum. Gerið þetta sjálfir drengir, þetta er ykkar rödd en ekki annara,“ sagði Neville.

Foden varð að Íslandsvini síðasta haust þegar hann var rekinn úr verkefni enska landsliðsins, hann og Mason Greenwood gerðust þá sekir um sóttvarnarbrot.