Mohamed Salah, framherji Liverpool, leggur hönd á plóg hvað Covid-19 baráttuna í Egyptalandi varðar.
Nú á dögunum bárust af því fréttir að einstaklingar, veikir af Covid-19, væru að láta lífið í Egyptalandi vegna skorts á súrefni. Salah var fljótur að bregðast við og sá til þess að súrefniskútum var komið til Egyptalands í flýti.
„Salah og fjölskylda hans hafa gefið súrefniskúta til Basyoun spítalans til þess að hjálpa einstaklingum sem glíma við Covid-19 í Nagrig,“ sagði Hassan Bakr, framkvæmdastjóri Nagrig Charity Association, góðgerðasamtaka sem Salah kom á laggirnar árið 2017.
Salah er sjálfur frá bænum Nagrig í norðvestur hluta Egyptalands og hefur í gegnum tíðina nýtt sér stöðu sína til þess að hjálpa til með ýmsum góðverkum í Egyptalandi.