Matthías Vilhjálmsson nýjasti leikmaður FH segist ekki hafa getað litið fram hjá því þegar kallið hafi komið frá hans gamla félagi.
Þetta kemur fram í viðtali sem birtist við Matthías á facebook síðu Valerenga.
,,FH hefur verið á toppnum í Íslenskum fótbolta frá árinu 2004, árangurinn hefur aðeins látið á sér standa síðustu ár en möguleikar liðsins til framtíðar líta vel út,“ sagði Matthías.
Matthíasi lýst vel á þær áætlanir sem menn hafa í Kaplakrika.
,,Eiður Smári Guðjohnsen er þjálfari, menn stefna hátt og vilja búa til gott lið.“
Matthías hefur spilað í Noregi frá árinu 2012 og segir að nú sé tímapunkturinn til þess að snúa aftur til Íslands.
,,Ég kom til Start árið 2012 og spilaði þar í nokkur ár, átti síðan sigursæla tíma hjá Rosenborg. Kom síðan til Valerenga og hef tekið þátt í uppbyggingunni hér. Ég mun enda atvinnumannaferilinn minn hér og hyggst gefa allt í þetta fyrir Valerenga,“ sagði Matthías.
Matthías klárar tímabilið með Valerenga í Noregi áður en hann snýr aftur heim til Íslands og undirbýr sig fyrir næsta tímabil með FH í Pepsi-Max deildinni.