FC Barcelona hefur staðfest að félagið sé búið að selja bakvörðinn, Nelson Semedo til Wolves fyrir 30 milljónir evra til að byrja með. Kaupverðið getur svo endað í 40 milljónum evra en nokkrar klásúlur er í samningi félaganna.

Semedo er hægri bakvörður frá Portúgal sem fann ekki takt sinn á Nývangi. Semedo er 26 ára gamall og lék í þrjú ár með Barcelona.

Það skal engum koma á óvart að umboðsmaður Semedo er Jorge Mendes sem á í góðu sambandi við Wolves. Semedo er nú sjöundi leikmaðurinn frá Mendes sem Wolves er með í sínum röðum.

Mendes er einnig með Diogo Jota sem Wolves seldi til Liverpool um liðna helgi.

Semedo skrifar undir þriggja ára samning til að byrja með en hægt er að framlengja hann til 2025.