José Mourinho, knattspyrnustjóri Tottenham, var ósáttur með spilamennsku og vinnuframlag leikmanna sinna eftir 0-1 tap gegn Everton í fyrsta leik liðanna í ensku úrvalsdeildinni þetta tímabilið.
,,Vandræði okkar hófust á því hvernig við pressuðum andstæðinginn, eða öllu heldur hvernig við pressuðum hann ekki. Við gáfum þeim of mikinn tíma til þess að byggja upp sínar sóknir,“ sagði Mourinho í viðtali við Sky Sports eftir leik.
Hann sakaði leikmenn sína um leti. Eitthvað sem er ekki líklegt til árangurs í ensku úrvalsdeildinni. Þá segist hann hafa fengið vísbendingar í leiknum um að einhverjir leikmenn séu ekki komnir í nægilega gott form.
,,Matt Doherty átti erfitt uppdráttar í leiknum. Hann náði ekki að spila sinn leik og ekki eins og við viljum að hann spili,“ sagði Mourinho.
Þá vakti Mourinho einnig athygli á því að kórónuveirufaraldurinn hefði haft mikil áhrif á undirbúning liðsins fyrir tímabilið. Einhverjir leikmenn hefðu greinst með veiruna.
,,Við vorum með tilfelli þar sem leikmenn greindust með veiruna, aðrir leikmenn þurftu síðan að fara í sóttkví. Það gerði okkur erfitt fyrir.“