Miklar umræður hafa verið í kringum drög KSÍ að reglum um framkvæmd knattspyrnuleikja í kórónuveirufaraldrinum. Fótbolti.net greinir frá því að aðildarfélögum KSÍ hafi verið tilkynnt að aðeins Stöð 2 Sport megi taka viðtöl við leikmenn og þjálfara eftir leiki þegar íslenska knattspyrnan fer aftur af stað.

Gunnar Sigurðsson, sem hefur mikla reynslu af fjölmiðlum, er einn þeirra sem gagnrýnir þetta á samfélagsmiðlinum Twitter. „Það er óskiljanlegt rugl, ef rétt reynist, að KSÍ ætli að Covid-banna öllum fjölmiðlum, nema einum, að taka viðtal við þjálfara/leikmenn eftir fótboltaleiki,“ segir Gunnar en Þosteinn Haukur Harðarson, framkvæmdastjóri Víkings í Ólafsvík slær á sömu strengi á Twitter-síðu sinni.

„Með enga áhorfendur er umfjöllun fjölmiðla enn mikilvægari en nú mega bara rétthafar taka viðtöl eftir leiki en ekki Fótbolti.net sem er eini fjölmiðillinn sem hefur sinnt Lengjudeildinni. Er eitthvað líklegra að smitast frá Fótbolta.net en Stöð2Sport?“ spyr Víkingur.